🔴 បង្ក្រាបករណីធំកក្រើកបាវិត! បណ្តាញគ្រឿងញៀនឆ្លងដែន បែកធ្លាយ ឃាត់ខ្លួនជនបរទេស ៥នាក់ ដកហូតថ្នាំញៀនជាង ៤៤គីឡូក្រាម ព្រមទាំងអាវុធខុសច្បាប់

ខេត្តស្វាយរៀង៖ ប្រតិបត្តិការដ៏តឹងរ៉ឹងមួយរបស់កម្លាំងនគរបាលខេត្តស្វាយរៀង បានបង្កការភ្ញាក់ផ្អើលយ៉ាងខ្លាំង បន្ទាប់ពីបំបែកបានបណ្តាញជួញដូរ និងរក្សាទុកគ្រឿងញៀនទ្រង់ទ្រាយធំមួយ នៅក្រុងបាវិត។

ប្រតិបត្តិការនេះ អនុវត្តតាមបទបញ្ជាដ៏ម៉ឺងម៉ាត់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងការដឹកនាំផ្ទាល់ពីលោកឧត្ដមសេនីយ៍ទោ ពេជ្រ វីរៈ ស្នងការនគរបាលខេត្ត។ នៅថ្ងៃទី១៨ ខែមីនា ឆ្នាំ២០២៦ លោកឧត្ដមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន បានដឹកនាំកម្លាំងជំនាញ សហការជាមួយនគរបាលក្រុងបាវិត ចុះបង្ក្រាបដល់ទីតាំងបន្ទប់ជួលមួយកន្លែង ស្ថិតនៅភូមិបាវិតកណ្ដាល សង្កាត់បាវិត។

ជាលទ្ធផល សមត្ថកិច្ចបានឃាត់ខ្លួនជនសង្ស័យចំនួន ០៥នាក់ (ប្រុស) ក្នុងនោះមានជនជាតិវៀតណាម ០៤នាក់ និងជនជាតិចិន ០១នាក់ ពាក់ព័ន្ធនឹងសកម្មភាពជួញដូរ ដឹកជញ្ជូន រក្សាទុក កែច្នៃ និងប្រើប្រាស់គ្រឿងញៀន ព្រមទាំងកាន់កាប់អាវុធ និងគ្រាប់រំសេវដោយខុសច្បាប់។

វត្ថុតាងដកហូតបានរួមមាន៖

សារធាតុញៀនគ្រប់ប្រភេទ ទម្ងន់សរុប ៤៤គីឡូក្រាម ៧៦៨.២២ក្រាម

សារធាតុមិនទាន់កំណត់ប្រភេទ ទម្ងន់ ៨គីឡូក្រាម ៩៦១.១៤ក្រាម

ជញ្ជីងថ្លឹងចំនួន ១០គ្រឿង

អាវុធខ្លី ០៤ដើម បង់ ០៤ និងគ្រាប់ចំនួន ២០០គ្រាប់

ទូរស័ព្ទដៃ ០៦គ្រឿង

រថយន្ត ០១គ្រឿង និងសម្ភារពាក់ព័ន្ធមួយចំនួនទៀត

បច្ចុប្បន្ន ជនសង្ស័យទាំងអស់ រួមជាមួយវត្ថុតាង ត្រូវបានកម្លាំងជំនាញកំពុងកសាងសំណុំរឿង បញ្ជូនទៅសាលាដំបូងខេត្តស្វាយរៀង ដើម្បីចាត់ការតាមនីតិវិធីច្បាប់។

👉 ប្រតិបត្តិការនេះ ត្រូវបានគេមើលឃើញថា ជាផ្នែកមួយនៃយុទ្ធនាការរឹតបន្តឹងការបង្ក្រាបគ្រឿងញៀន និងបណ្តាញឆ្លងដែន ដែលកំពុងកើនឡើងក្នុងតំបន់ព្រំដែន។